التوسع الكونى

[خديجه]

صباح الخير عليكم جميعا اعضاء نسوانجى على الصبح كده حبيت اتكلم على حاجة اسمها التوسع الكونى او الامتداد الكونى انت ياعم انت بتقول ايه كون ايه اللى بيتوسع ولا بيمتد ع الصبح انت صاحى تهبد ايه الصداع ده صديقى العزيز فنجان قهوتك الجميل وتعالى وانا افهمك بقى .





زمان الناس كانت فاكرة إن الكون ثابت والمجرات في أماكنها مش بتتحرك لحد ما العلماء اكتشفوا حاجة غيرت كل المفاهيم دي الكون بيتمدد يعني المسافات بين المجرات بتكبر مع الوقت وده معناه إن الكون مش واقف، لأ، ده بيتغير وبيكبر كل لحظة.



القصة بدات ازاي



1. أينشتاين والنسبية العامة سنة 1915

أينشتاين عمل معادلات جديدة بتشرح الجاذبية بس كان شايف إن الكون لازم يفضل ثابت فحط حاجة اسمها الثابت الكوني علشان يوازن المعادلات.





2. إدوين هابل سنة 1929

الراجل ده راقب المجرات من تليسكوب ولاحظ إن كل المجرات اللي بعيد عننا ضوءها بيتحول للأحمر ده اسمه الانزياح الأحمر وده معناه إنها بتبعد عننا وكل ما المجرة تكون أبعد بتبعد بسرعة أكتر من هنا قال الكون بيتمدد







يعني ايه الكون بيتمدد



مش المجرات اللي بتتحرك بعيد لوحدها لأ الفضاء اللي بينهم هو اللي بيكبر.



تخيل عندك عجينة وحاطط فيها زبيب لما العجينة تختمر وتكبر حبات الزبيب هتلاقى نفسها بتبعد عن بعض مش لأنها بتحرك لكن علشان العجينة نفسها وسعت.













التمدد ده جه منين



لو رجعنا الشريط الورى طالما الكون بيتمدد يبقى في يوم من الأيام كان صغير جدا جدا لحد ما نوصل لنقطة البداية اللي العلماء بيسموها الانفجار العظيم Big Bang



الانفجار ده حصل من حوالي 13.8 مليار سنة ومنه بدأ الزمن والفضاء وكل حاجة حوالينا.











المفاجاة التوسع مش بس شغال ده بيتسارع



العلماء في سنة 1998 اكتشفوا حاجة أغرب التوسع الكوني مش ثابت، ده بيتسارع



يعني الكون بيجري وبيكبر أسرع وأسرع مع الوقت.



السبب في كده حاجة غامضة جدا اسمها الطاقة المظلمة وهي اللي بتدفع الكون إنه يتمدد أسرع ومحدش لحد دلوقتي فاهمها تمام.







طيب إيه مصير الكون



في كذا احتمال والموضوع لسه مش محسوم



1. الكون هيستمر يتمدد لحد ما يبرد Big Freeze

يعني بعد مليارات السنين كل حاجة هتبرد وتنطفي والكون هيبقى فاضي وساكت.





2. الكون هيتمزق Big Rip

لو الطاقة المظلمة فضلت تسرع التمدد ممكن في الآخر نسيج الكون نفسه يتقطع وكل حاجة تتفكك.





3. الكون ممكن ينكمش تاني Big Crunch

لو الجاذبية كانت أقوى من التمدد ممكن الكون يرجع ينهار على نفسه. بس ده احتمال ضعيف جدا دلوقتي.





الكون حوالينا مش ساكن ده في حالة حركة وتغير مستمر وكل ما بنتعلم أكتر عن تمدده بنفهم شوية عن تاريخه ومستقبله لكن لسه في ألغاز كبيرة زي الطاقة المظلمة والمادة المظلمة مستنيانا نحلها وكنت عامل عنها مواضيع هنا برده .



ها فهمت يا صديقى مطلعتش بهبد اهو كده نبقى خلصنا الموضوع بتاعكم ونهاركم ويومكم جميل ​